Sektori për Punë të Brendshme – Shkup, në bashkëpunim me Prokurorinë Themelore Publike, ka njoftuar se po ndërmerr masa pas brohoritjeve “Ilirida” gjatë ndeshjes së Ligës së Konferencës mes Shkëndijës dhe Qarabağut, të zhvilluar në Arenën “Todor Proeski”, raporton Portalb.mk.
“Ju informojmë se SPB Shkup, bazuar në materialin e regjistruar dhe të dokumentuar, po merr masa në koordinim me prokurorin publik kompetent,” thuhet në njoftimin e MPB-së.
Gjatë transmetimit të ndeshjes janë dëgjuar thirrje “Ilirida” – një term që, sipas mediave maqedonase, lidhet me një koncept politik të një pjese të shqiptarëve në Maqedoninë e Veriut për krijimin e një republike të pavarur në pjesën perëndimore të vendit.
Rasti në Kumanovë dhe mungesa e reagimeve institucionale
Ky është incidenti i dytë i këtij lloji brenda një kohe të shkurtër. Më herët, në një ndeshje basketbolli në Kumanovë, u dëgjuan brohoritje të hapura kundër shqiptarëve si: “shqiptar i mirë është shqiptar i vdekur”, “dhoma gazi për shqiptarët” dhe “Maqedoni e pastër”.
Për këtë rast, asnjë organ i rendit nuk reagoi menjëherë. Procedurat nga prokuroria dhe policia nisën vetëm pas presionit publik dhe reagimeve politike, të cilat u konsideruan të vonuara dhe formale. Prokuroria kërkoi pamjet nga kamerat e sigurisë, ndërsa policia arrestoi një person që tentoi të vendoste një banderolë me përmbajtje fyese.
Megjithatë, pavarësisht paralajmërimeve për masa të rrepta, incidenti i intolerancës u përsërit dje në Shkup, duke ngritur pikëpyetje për efektivitetin e reagimeve zyrtare.
