Parlamenti i Bullgarisë ka miratuar një rezolutë të re, e cila rikonfirmon kërkesat e mëparshme ndaj Maqedonisë së Veriut, përfshirë kushtin që bullgarët të përfshihen në Kushtetutën maqedonase si komb përbërës. Sipas dokumentit, nuk do të ketë negociata për kushte të reja, duke forcuar pozicionin zyrtar të Sofjes në raport me integrimin evropian të Shkupit.
Ndërkohë, në Maqedoninë e Veriut ka nisur një debat i gjallë politik mbi një rezolutë që pritet të miratohet në Parlamentin Evropian, e cila sipas qeverisë maqedonase do të shërbejë si konfirmim i identitetit dhe gjuhës maqedonase.
Ekspertët: Rezoluta e Brukselit, simbolike por jo vendimtare
Sipas analistëve, miratimi i kësaj rezolute nga Brukseli do të ishte i rëndësishëm në planin diplomatik, por nuk është e mjaftueshme për të garantuar ndryshime kushtetuese në vend.
“A është kjo rrugë drejt ndryshimeve kushtetuese? Po, është një hap përpara, por jo i vetmi dhe as i mjaftueshëm. Kyç mbetet mbrojtja e procesit të zgjerimit të BE-së nga kërkesat dypalëshe të shteteve anëtare”, u shpreh Marko Troshanovski nga organizata “Societas Civilis”.
Mickoski kërkon lobim nga opozita në Bruksel
Kryeministri Hristijan Mickoski ka bërë thirrje që opozita maqedonase të lobojë tek partnerët e saj në Parlamentin Evropian për të siguruar mbështetjen e nevojshme për rezolutën.
Opozita ka shprehur gatishmëri për të mbështetur një nismë të tillë, por shpreh skepticizëm se kjo do të jetë e mjaftueshme për të nxitur ndryshime kushtetuese.
“Pyetja është nëse kjo deklaratë, nëse miratohet, do të jetë garanci e mjaftueshme për të ndërmarrë ndryshimet kushtetuese. Deri tani kemi parë linja të kuqe që më pas zëvendësohen me të tjera”, tha Venko Filipçe, kryetar i LSDM-së.
Qeveria: Kërkesë për të mirën e vendit, jo politike
Zëdhënësja e VMRO-DPMNE-së, Marija Miteva, theksoi se kërkesa e kryeministrit Mickoski nuk ka karakter personal, por është në funksion të interesit kombëtar.
“Kjo nuk është një kërkesë personale, por një obligim ndaj vendit. Bëhet fjalë për njohjen ndërkombëtare të identitetit dhe gjuhës maqedonase, që është një vlerë historike”, deklaroi ajo.
Raporti për identitetin maqedonas pritet në fillim të qershorit
Kryeministri Mickoski njoftoi se në fillim të qershorit, deputetëve do t’u dorëzohet një raport zyrtar që përfshin identitetin dhe gjuhën maqedonase si pjesë e gjuhëve zyrtare të OKB-së. Votimi për këtë raport pritet të zhvillohet në muajin korrik.
