Një reklamë televizive e transmetuar në Kanada ka shkaktuar tensione të reja mes Otavës dhe Uashingtonit, duke detyruar kryeministrin kanadez Mark Carney t’i kërkojë falje Presidentit amerikan Donald Trump. Reklama, e financuar nga qeveria e Ontarios, përfshinte një fragment të redaktuar nga një fjalim i ish-presidentit Ronald Reagan në vitin 1987, ku kritikohej vendosja e tarifave tregtare ndaj mallrave të huaja.
Trump reagoi menjëherë, duke e quajtur reklamën “të rreme” dhe urdhëroi pezullimin e negociatave tregtare me Kanadanë, si dhe rritjen e tarifave ndaj mallrave kanadeze.
Gjatë një vizite në Korenë e Jugut, Carney pranoi se i kishte kërkuar falje Trump-it personalisht gjatë një darke zyrtare. “Vendimi për ta transmetuar reklamën nuk ishte diçka që unë do ta kisha bërë. Për këtë arsye, i kërkova falje Presidentit Trump. Si kryeministër, mbaj përgjegjësi për marrëdhënien me Shtetet e Bashkuara,” tha ai.
Carney shtoi se reklama ishte iniciuar nga kryeministri i Ontarios, Doug Ford, qeveria e të cilit kishte financuar fushatën. “Z. Ford mori vendimin e tij, është i pavarur, por reklama nuk ishte e dobishme,” u shpreh ai. Ford ndërkohë e ka mbyllur fushatën, duke deklaruar se synimi ishte “të hapte debat mbi ndikimin e tarifave te punëtorët amerikanë”.
Në Kanada, reagimet janë përzier: ndërsa disa e kanë përshëndetur gjestin e Carney-t si diplomatik, të tjerë e kanë parë si dobësi ndaj presionit të Trump-it. Kryeministri i Kolumbisë Britanike, David Eby, ka njoftuar se provinca e tij po shqyrton publikimin e një reklame të ngjashme kundër tarifave amerikane.
Nga ana tjetër, Presidenti Trump konfirmoi se kishte marrë kërkesën për falje nga Carney, duke e përshkruar marrëdhënien e tyre si “të mirë”, por sqaroi se negociatat tregtare do të mbeten pezull për momentin.
Që prej rikthimit të Trump në pushtet, marrëdhëniet SHBA–Kanada janë tensionuar ndjeshëm për shkak të tarifave të reja doganore dhe deklaratave provokuese të presidentit amerikan, i cili madje ka thënë se “Kanadaja duhet të bëhet shteti i 51-të i SHBA-së”.
