Kryeministri i Kanadasë, Mark Carney, ka hedhur poshtë pretendimet e administratës së presidentit amerikan Donald Trump se ai është tërhequr nga deklaratat e bëra në Forumin Ekonomik Botëror në Davos, të cilat kanë shkaktuar reagime të forta në Uashington.
Duke folur të martën para gazetarëve në Parliament Hill, Carney theksoi se fjalimi i tij ishte i menduar dhe i qëllimshëm.
“Për të qenë absolutisht i qartë – dhe këtë ia thashë edhe presidentit – e thashë me bindje atë që thashë në Davos. Ishte e qartë,” deklaroi Carney, para një mbledhjeje të kabinetit.
Fjalimi i Carney në Forumi Ekonomik Botëror në Davos u bë viral javën e kaluar, pasi ai u bëri thirrje “fuqive të mesme” që të bashkohen dhe të përballen me “hegjemonët”, një deklaratë që u interpretua gjerësisht si kritikë ndaj rolit dominues të Shteteve të Bashkuara në ekonominë globale.
Këto komente kanë tensionuar më tej marrëdhëniet tregtare mes Kanadasë dhe SHBA-së. Administrata Trump e ka kritikuar publikisht Carney-n, ka kërcënuar Kanadanë me tarifa deri në 100 për qind dhe ka anuluar ftesën e tij për t’iu bashkuar të ashtuquajturit “Bord i Paqes”. Trump madje e quajti Carney-n “guvernator”, duke përdorur një term tallës që më parë e kishte përdorur edhe për ish-kryeministrin Justin Trudeau.
Carney pranoi se ka zhvilluar një bisedë private me presidentin amerikan, por Zyra e Kryeministrit nuk pranoi të publikojë një përmbledhje zyrtare të saj.
“Kanadaja ishte vendi i parë që e kuptoi ndryshimin në politikën tregtare të SHBA-së që presidenti kishte iniciuar, dhe ne po i përgjigjemi kësaj,” tha Carney, duke shtuar se Kanadaja po forcon lidhjet me partnerë të tjerë ndërkombëtarë, ndërkohë që mbetet e hapur për riformësimin e marrëdhënieve me SHBA-në në kuadër të Marrëveshjes SHBA–Meksikë–Kanada (USMCA).
Ndërkohë, Sekretari amerikan i Thesarit, Scott Bessent, deklaroi në një intervistë për Fox News se Carney kishte tentuar të tërhiqej nga deklaratat e tij gjatë bisedës me Trump, duke shtuar se Kanadaja “varet shumë nga SHBA-ja” dhe se tregtia veri–jug është jetike për ekonominë kanadeze.
Pavarësisht këtyre kritikave, Carney ka bërë të qartë se nuk ka ndërmend të zbusë mesazhin e tij, duke theksuar se politika e jashtme dhe tregtare e Kanadasë do të udhëhiqet nga interesat kombëtare dhe realitetet e reja globale.
