Një sistem i ri jo-invaziv dhe i veshshëm i ndërfaqes tru-kompjuter (BCI), i zhvilluar nga Universiteti i Kalifornisë, Los Angeles (UCLA), përdor inteligjencën artificiale për t’i dhënë autonomi pacientëve me aftësi të kufizuara fizike.
Ky BCI i avancuar vepron si një “bashkë-pilot”, duke kuptuar qëllimet e përdoruesve dhe duke ndihmuar në kontrollin e një krahu robotik ose kursori kompjuteri, duke ofruar një mënyrë më të sigurt dhe praktike për individët me paralizë ose sëmundje neurologjike.
Autonomia për pacientët me lëvizshmëri të kufizuar
“Duke përdorur inteligjencën artificiale për të plotësuar sistemet BCI, synojmë rrugë shumë më pak invazive dhe më të sigurta,” tha Jonathan Kao, profesor i asociuar i inxhinierisë elektrike dhe kompjuterike në UCLA. “Qëllimi ynë është që njerëzit me çrregullime të lëvizjes, si paraliza ose ALS, të rifitojnë pavarësinë për detyrat e përditshme.”
Sistemi çiftëzon një kapak elektroencefalografie (EEG) me një platformë AI të bazuar në kamera, e cila regjistron aktivitetin e trurit dhe interpreton qëllimet e përdoruesit në kohë reale, duke mundësuar lëvizjen e kursorit ose krahut robotik.
Testimet e para
Sprovat u kryen në katër pjesëmarrës, tre individë të shëndetshëm dhe një pacient i paralizuar. Në një provë me dy detyra – lëvizja e kursori në tetë objektiva dhe përdorimi i krahut robotik për të lëvizur katër blloqe – pjesëmarrësi i paralizuar përfundoi detyrën në rreth gjashtë minuta e gjysmë me ndihmën e AI-së, një veprim që nuk mund ta realizonte vetë.
“Hapat e ardhshëm për sistemet AI-BCI mund të përfshijnë krahë robotikë me më shumë shpejtësi dhe precizion, si dhe aftësi për të kapur objektet në mënyrë më të natyrshme,” tha Johannes Lee, bashkë-autori kryesor dhe kandidat doktorature në UCLA.
Një standard i ri për BCI jo-invazive
Ky sistem vendos një standard të ri për performancën e BCI-ve jo-invazive dhe ka potencial për të përmirësuar cilësinë e jetës së individëve me paralizë ose sëmundje neurologjike, duke u mundësuar atyre të rifitojnë pavarësi në detyrat e përditshme.
Në vitet e fundit, përparimi i teknologjisë së ndërfaqes tru-kompjuter ka qenë i shpejtë; një sistem i ngjashëm nga Universiteti i Kalifornisë, Davis, i ka mundësuar një pacienti me ALS të komunikojë në kohë reale.
Gjetjet e reja u botuan në revistën Nature Machine Intelligence.
