Nënkryetarja e Partia Demokratike e Kosovës, Vlora Çitaku, ka deklaruar se partia e saj mbetet një subjekt shtetformues që ka dëshmuar përgjegjësi në momentet më të vështira për vendin.
Përmes një postimi publik, ajo theksoi se kreu i PDK-së, Bedri Hamza, në takimin me kryeministrin Albin Kurti nuk ka shkuar për të bërë pazare politike, por për të ofruar mundësi reale për të dalë nga kriza politike që, sipas saj, ka përfshirë vendin prej kohësh.
Çitaku u shpreh se PDK ka shkuar në takim me seriozitet dhe përgjegjësi, duke qenë e gatshme të ofrojë kandidatura që do të garantonin stabilitet institucional dhe balancë politike.
“Ne kemi qenë të gatshëm të ofrojmë kandidatura që do të garantonin siguri institucionale, balancë politike dhe, mbi të gjitha, personalitete që do të ishin garant të rendit kushtetues. Nuk kemi shkuar për të ofruar kundërkandidat formal për hir të inatit apo për konsum ditor politik”, ka shkruar ajo.
Sipas Çitakut, zgjedhja e presidentit nuk duhet të shndërrohet në një garë force mes partive politike, por në një moment të rëndësishëm për stabilitetin institucional dhe besimin e qytetarëve.
Në fund të reagimit të saj, ajo i bëri thirrje shumicës parlamentare që të reflektojë, duke theksuar se Kosova është më e rëndësishme se interesat individuale apo partiake.
