UEFA ka vendosur një ndëshkim drastik ndaj FK Arsenal Tivat nga Mali i Zi, duke e përjashtuar nga garat evropiane për dhjetë vjet dhe duke vendosur pezullime të përjetshme dhe shumëvjeçare për disa individë, në një nga skandalet më të mëdha të manipulimit të rezultateve në historinë e futbollit europian.
Vendimi i Organit të Kontrollit, Etikës dhe Disiplinës së UEFA-s (CEDB) u mor pas një hetimi të gjatë lidhur me dyshimet për trukim të ndeshjes mes Arsenal Tivat dhe Alaškert në kualifikimet e Ligës së Konferencës në korrik 2023.
Skandal i rëndë me bastet sportive
Sipas raportimeve të mediave të huaja, përfshirë “Vijesti” të Podgoricës dhe televizionin polak TVP, dyshimet për trukim nisën gjatë pjesës së parë të ndeshjes, kur vetëm brenda 35 minutave agjencitë e basteve regjistruan mbi 250,000 euro në bastet për “2+ gola”. Goli i parë ra në minutën e 40-të, ndërsa i dyti në shtesën e pjesës së parë. Më pas, në pjesën e dytë, pagesat e dyshimta vazhduan për “5+” dhe “7+ gola”, përforcuar dyshimet për manipulim.
Vendimi i UEFA-s: Përjashtime dhe gjoba të rënda
Sipas komunikatës zyrtare të UEFA-s:
-
FK Arsenal Tivat gjobitet me 500,000 euro dhe përjashtohet nga të gjitha garat evropiane për 10 vjet, deri në sezonin 2034/35.
-
Nikola Çelebiq (lojtar) dhe Ranko Krgoviq (zyrtar i klubit) janë përjashtuar përjetësisht nga çdo aktivitet në futboll, për shkelje të neneve 11 dhe 12 të Kodit Disiplinor të UEFA-s, që lidhen me sjellje të papërshtatshme dhe manipulim ndeshjesh.
-
Çetko Manojloviq, Radule Zhivkoviq dhe Dushan Puletiç janë pezulluar për 10 vjet secili nga çdo aktivitet futbollistik.
-
Milan Vignjeviq dhe Goran Janjusheviq, zyrtarë të FK Radniçki Obrenovac, u ndëshkuan gjithashtu me pezullime prej 10 dhe 6 vjetësh për përfshirje në këtë skandal.
-
Christos Psomaidis, përfshirë në hetim, është pezulluar për 8 vjet.
UEFA kërkon shtrirje globale të ndëshkimeve nga FIFA
Sipas UEFA-s, të gjitha sanksionet do të kërkohen për zbatim global nga FIFA, duke ndaluar të përfshirët që të marrin pjesë në çfarëdo aktiviteti futbolli në mbarë botën.
Një prej skandaleve më të rënda në dekadën e fundit
Ky vendim është një mesazh i qartë nga UEFA për zero tolerancë ndaj manipulimit të ndeshjeve, duke vendosur një precedent të fortë disiplinor ndaj çdo klubi apo individi që shkel integritetin e lojës.
Skandali i FK Arsenal Tivat tashmë shihet si një nga rastet më të rëndësishme të ndërhyrjes së industrisë së basteve në futbollin evropian, dhe pritet të pasohet me hetime të mëtejme edhe nga autoritetet kombëtare dhe ndërkombëtare.
