Bashkëkryetari i Frontit të Gjelbër të Majtë (ZLF), Radomir Lazović, deklaroi se megjithëse kërcënimet nga presidenti i Serbisë, Aleksandar Vuçiq, duhen marrë seriozisht – pasi ai është i gatshëm për gjithçka – qytetarët nuk frikësohen më, pavarësisht përpjekjeve të tij.
“Vuçiq ka provuar të na rrahë, të na arrestojë, të na sulmojë përmes mediave, të na përgjojë, të na ndjekë… Ka bërë gjithçka kundër qytetarëve, gjë që një president i shtetit nuk duhet ta bëjë, sikurse edhe policia nëse do të vepronte sipas ligjit”, tha Lazović për agjencinë Beta.
Ai shtoi se Vuçiq, sipas tij, i ka përdorur të gjitha resurset dhe lidhjet me krimin për të frikësuar qytetarët, por nuk ka arritur ta bëjë këtë.
“Njerëzit janë të vendosur të ndryshojnë Serbinë. Këtë e shohim në të gjitha protestat që po mbahen këto ditë. Ekziston një solidaritet dhe përkrahje e madhe”, theksoi ai.
Lazović i quajti kërcënimet serioze, por theksoi se qytetarët nuk tremben më dhe nuk pranojnë kthimin në të kaluarën.
Ai tha se mesazhi i tij për Vuçiqin është i qartë: “Ka përfunduar me përpjekjet për frikësim”.
“Kërcënimet e tij nuk do ta frikësojnë askënd. Ne do të luftojmë kundër represionit dhe regjimit të tij kriminal. Duhet të bashkohemi të gjithë dhe ta ndalim atë që po bën – ndaljen e Serbisë”, shtoi ai.
Lazović theksoi gjithashtu se ekipi juridik i ZLF-së është në dispozicion për të gjithë ata që nuk kanë përkrahje ligjore.
“Mendoj se në ditët në vijim do të jetë thelbësore të tregojmë edhe më shumë solidaritet. Më duket se regjimi po bëhet gjithnjë e më agresiv ndaj qytetarëve”, paralajmëroi ai.
Sipas tij, “Serbia është e gatshme për ndryshim”, dhe shtoi se “regjimi i Vuçiqit është në rrugë për t’u bërë pjesë e historisë politike – çështja është vetëm se kur dhe me çfarë çmimi”.
Në fund, ai akuzoi presidentin Vuçiq se “po ikën nga zgjedhjet” dhe se është i gatshëm për gjithçka vetëm për të qëndruar në pushtet.
“Prandaj duhet të bashkojmë forcat dhe ta largojmë sa më shpejt, pa viktima”, përfundoi Lazović për Betan, transmeton Qendra.INFO
