Deputetja e komunitetit boshnjak në Kuvendin e Kosovës, Duda Balje, ka deklaruar sot publikisht se i është ofruar një post akademik në Shkup në këmbim të votës së saj për Albulena Haxhiun si kryetare të Kuvendit. Kjo deklaratë e saj vjen pas seancës parlamentare, ku Balje ka ndarë me publikun detaje rreth ofertës që thotë se ka ardhur nga persona të lidhur ngushtë me kryeministrin Albin Kurti.
Sipas deputetes Balje, kontakti është bërë përmes një përfaqësuesi të një partie politike nga Maqedonia e Veriut. Ajo refuzoi të zbulojë identitetin e këtij personi, duke thënë se ai është mik i saj dhe një ish-pjesëtar i Ushtrisë Çlirimtare të Kosovës (UÇK), për të cilin ka respekt personal dhe profesional.
“Jam shumë e sigurt që partia që më ka ofruar këtë pozitë është e afërt me Albin Kurtin. Mendoj që e kanë bërë këtë për ta ndihmuar atë për të siguruar një votë shtesë në Kuvend,” deklaroi Balje për televizionin Klan Kosova, raportuar nga Insajderi.
Ajo shtoi se lidhjet mes Kurtit dhe partisë maqedonase janë të forta dhe se beson që kjo ofertë është bërë si një formë ndihmese ose mirënjohjeje, duke aluduar në mbështetjen që, sipas saj, Kurti ua ka ofruar atyre gjatë zgjedhjeve në Maqedoninë e Veriut.
Në reagim ndaj këtyre akuzave, Donika Gërvalla, anëtare e Listës së Vetëvendosjes, mohoi kategorikisht çdo lloj pazari politik. Ajo i bëri thirrje Baljes dhe deputetit tjetër, Haxha, që të heqin dorë nga, siç tha ajo, “qasje bllokuese”.
“Zonja Balje dhe zoti Hoxha duhet të kuptojnë se nuk jemi në pazar ku shitemi dhe blihemi. Konstituimi i Kuvendit është një çështje parimore. Nuk kam dijeni për ndonjë marrëveshje apo pazar të tillë,” tha Gërvalla në një deklaratë për mediat, e cituar nga Insajderi.
Deklaratat e Baljes kanë ngritur pikëpyetje të reja mbi ndërhyrjet politike dhe ndikimet ndërkufitare në proceset parlamentare në Kosovë, ndërsa mbetet të shihet nëse do të ketë hetime apo reagime të mëtejshme institucionale mbi këtë çështje.
