Familjet në Austri po përfitojnë aktualisht më shumë mbështetje financiare nga shteti, me ndihma që në disa raste arrijnë deri në 970 euro për fëmijë në muaj, sipas një studimi të fundit.
Studimi i realizuar nga Joanneum Research, me porosi të Ministrisë Federale për Familjet dhe të Rinjtë, analizon vitin 2025 në krahasim me vitet 2021 dhe 2023, duke treguar një rritje të dukshme të përfitimeve për familjet, veçanërisht për ato me të ardhura të ulëta dhe për prindërit beqarë.
Sipas të dhënave, familjet në Austri marrin aktualisht nga 425 deri në 770 euro në muaj për fëmijë, ndërsa për familjet me një prind mbështetja mund të arrijë deri në 970 euro për fëmijë. Rritja për këtë kategori vlerësohet rreth 6 për qind, ndërsa për çiftet me dy fëmijë rreth 1.9 për qind.
Rritja e përfitimeve lidhet me një sërë reformash të ndërmarra vitet e fundit, përfshirë indeksimin e ndihmave familjare, rritjen e bonusit familjar, ndryshimet në grantet studentore si dhe shtesat për fëmijë dhe paketat mbështetëse për fillimin e shkollës.
Megjithatë, studimi paralajmëron se nga viti 2026 e tutje priten humbje për familjet, si pasojë e pezullimit të indeksimit të ndihmave familjare. Kjo nënkupton se përfitimet nuk do të rriten më në përputhje me inflacionin, duke ulur gradualisht vlerën reale të mbështetjes financiare.
Sistemi i ndihmave familjare në Austri konsiderohet ndër më të zhvilluarit në Evropë, duke përfshirë rreth 300 forma të ndryshme përfitimesh – nga pagesat direkte dhe lehtësimet tatimore deri te subvencionet nga shtetet federale dhe komunat. Megjithatë, ekspertët theksojnë se jo të gjitha këto përfitime shfrytëzohen plotësisht nga familjet, pasi shumë prej tyre kërkojnë aplikim aktiv.
Autorët e studimit vlerësojnë se mbështetja financiare mbetet një element kyç për mirëqenien e familjeve dhe për parandalimin e varfërisë tek fëmijët, por paralajmërojnë se sfidat ekonomike dhe inflacioni mund të zbehin efektet e këtyre politikave në vitet në vijim.
