Ka dështuar për të 14-tën herë radhazi përpjekja për konstituimin e Kuvendit të Kosovës. Edhe në vazhdimin e seancës së së dielës, procesi u bllokua për shkak të mungesës së mbështetjes për ndryshimin e formës së votimit të kryetarit të Kuvendit.
Ashtu si në pesë seancat e fundit, Lëvizja Vetëvendosje propozoi që votimi të zhvillohet në mënyrë të fshehtë, por sërish nuk arriti të sigurojë shumicën për formimin e komisionit që do ta mbikëqyrte këtë proces. Për propozimin votuan 54 deputetë, pa vota kundër apo abstenime – numër i pamjaftueshëm për ta kaluar.
Në mungesë të konsensusit, Kuvendi nuk arriti të zgjedhë kryetarin, duke e zgjatur edhe më tej ngërçin institucional që po e mban pezull funksionimin e plotë të legjislativit.
Seanca e radhës është caktuar për të martën, më 14 maj, në orën 10:00.
