Ministrja në detyrë e Drejtësisë, Albulena Haxhiu, ka dështuar për herë të 14-të në përpjekjen për t’u zgjedhur kryetare e Kuvendit të Kosovës. Kandidatura e saj, e mbështetur fuqishëm nga Lëvizja Vetëvendosje, nuk ka arritur të sigurojë numrin e nevojshëm të votave as këtë herë, duke thelluar krizën institucionale në vend.
Në një reagim të ashpër pas votimit, kreu i Partisë Demokratike të Kosovës (PDK), Memli Krasniqi, ka akuzuar kryeministrin në detyrë, Albin Kurti, se po e mban peng shtetin vetëm për të imponuar Albulena Haxhiun si kryetare Kuvendi.
“Ajo çfarë po bën Kurti dhe Vetëvendosje është e kundërta e vullnetit të qytetarëve. Po e mbajnë shtetin peng për hir të një kandidature që dihet se nuk ka votat e nevojshme”, deklaroi Krasniqi.
Ai kritikoi procesin e votimit të fshehtë duke e cilësuar si një përpjekje për të fshehur dështimin e radhës, ndërsa ironizoi me përkushtimin e Kurtit ndaj Haxhiut:
“Për Kurtin, Albulena Haxhiu është më e rëndësishme se 1 milion qytetarë. Me këtë qasje të pakuptimtë, vendi rrezikon të mbetet pa institucione funksionale.”
Sipas Krasniqit, Kurti nuk i ka numrat për t’u rizgjedhur kryeministër, ndërsa vendi po futet gjithnjë e më thellë në një krizë të rëndë politike.
“Nëse kjo situatë nuk është krizë, nuk e di çka pret Kurti – që të na godasë ndonjë meteor nga qielli? Ne kemi një fatkeqësi institucionale para syve”, shtoi ai.
PDK ka kërkuar një zgjidhje të menjëhershme dhe të përgjegjshme politike për të dalë nga bllokada, ndërsa Vetëvendosje nuk ka dhënë sinjale për tërheqje nga kandidatura e Haxhiut.
