Bisedimet për paqe mes Shteteve të Bashkuara dhe Iranit kanë përfunduar pa rezultat, pas më shumë se 21 orësh negociata intensive të zhvilluara në Islamabad.
Zëvendëspresidenti amerikan, JD Vance, konfirmoi dështimin e këtyre bisedimeve, duke theksuar se pala iraniane nuk ka pranuar kushtet e vendosura nga Uashingtoni.
“Nuk arritëm në një pikë ku Irani të pranonte termat tanë. Lajmi i keq është se nuk kemi një marrëveshje”, deklaroi ai për mediat ndërkombëtare.
Sipas tij, SHBA-ja kishte bërë të qarta “vijat e kuqe” gjatë negociatave, por mungesa e dakordimit ka bërë që procesi të ndërpritet pa ndonjë rezultat konkret.
Delegacioni amerikan në këto bisedime përfshinte figura të rëndësishme si Jared Kushner dhe Steve Witkoff, të cilët tashmë pritet të largohen nga Pakistani pas përfundimit të raundit të negociatave.
Megjithatë, Vance vlerësoi rolin e Pakistanit si ndërmjetës, duke falënderuar autoritetet vendase për organizimin dhe lehtësimin e procesit.
Dështimi i këtyre bisedimeve shihet si një goditje për përpjekjet diplomatike për uljen e tensioneve në Lindjen e Mesme, ndërsa pritet të ndikojë në zhvillimet e ardhshme në rajon, ku situata mbetet e brishtë dhe e paparashikueshme.
