Distria Krasniqi, kampionia olimpike dhe një nga sportistet më të suksesshme të Kosovës, ka siguruar kualifikimin në finalen e Kampionatit Evropian të Xhudos, që po zhvillohet në Podgoricë, Mal i Zi.
Lajmi u konfirmua nga Komiteti Olimpik i Kosovës, i cili njoftoi se Krasniqi triumfoi në gjysmëfinale ndaj spanjolles Ariane Toro Soler, duke siguruar kështu një vend në përballjen finale për medaljen e artë.
Në finalen e madhe, Distria do të përballet me italianen Odette Giuffrida, një emër i njohur në skenën ndërkombëtare të këtij sporti dhe rivale e fortë në kategorinë e saj.
Tifozët kosovarë dhe mbështetësit e xhudos në vend janë në pritje të një tjetër paraqitje madhështore nga Krasniqi, e cila ka qenë vazhdimisht ambasadore e sportit dhe krenarisë kombëtare në arenën ndërkombëtare.
Finalja pritet të zhvillohet sot, dhe me formën që ka treguar, Distria synon të rikthehet në podiumin më të lartë të Evropës.
