Presidenti i Republikës Srpska, Milorad Dodik, ka reaguar pas vendimit të Komisionit Qendror Zgjedhor të Bosnjë dhe Hercegovinës për të revokuar mandatin e tij. Në një deklaratë për media, Dodik ka theksuar se do t’i drejtohet popullit me referendum për të vendosur lidhur me të ardhmen e tij politike.
“Mandati më është dhënë nga populli, prandaj do ta dëgjoj atë në një referendum për mua dhe funksionin që kryej, i cili do të mbahet në periudhën e ardhshme, bazuar në vendimin e Asamblesë Kombëtare”, deklaroi Dodik.
Pas një takimi me liderët e partive që përbëjnë koalicionin qeverisës në Republikën Srpska, ai theksoi se koalicioni mbetet i përkushtuar në mbrojtjen e rendit kushtetues dhe të Marrëveshjes së Dejtonit.
“Qëndrimi ynë kërcënohet fuqishëm nga veprimet e Christian Schmidt, i cili nuk është i ligjshëm dhe legjitim, nuk është konfirmuar nga Këshilli i Sigurimit dhe mbështetet vetëm nga një vullnet politik”, u shpreh Dodik, duke e konsideruar të padrejtë ndërhyrjen e Përfaqësuesit të Lartë në punët e brendshme të entitetit.
Ndërkohë, Komisioni Qendror Zgjedhor i Bosnjë dhe Hercegovinës ka njoftuar se vendimi për revokimin e mandatit të Presidentit Dodik është ende deklarativ dhe nuk është bërë i formës së prerë. Anëtari i KQZ-së, Suad Arnautović, bëri të ditur se palës i lejohet ankesë kundër vendimit, dhe procedurat mund të zgjasin një ose dy muaj për shkak të dokumentacionit të nevojshëm.
