Dogana e Kosovës ka ndërmarrë dy aksione të suksesshme kundër kontrabandës, duke sekuestruar mallra të paligjshme në Han të Elezit, Mitrovicë dhe Prishtinë.
Në pikën kufitare Hani i Elezit, mbrëmë rreth orës 21:30, Njësitë Antikontrabandë ndaluan një automjet Audi me targa të huaja, i dyshuar për transport mallrash të kontrabanduara. Pas tentativës për arratisje drejt zonës malore, automjeti u kontrollua dhe u gjetën 24 paketa me 150 kapsula kafeje për aparat (7.2 gr secila), pa dokumentacion përcjellës. Malli u konfiskua, dhe ndaj palës u iniciuan procedurat ligjore.
Ndërkohë, bazuar në informacionet e qytetarëve, njësitë antikontrabandë kontrolluan dy subjekte në Mitrovicë dhe Prishtinë, ku sekuestruan 58 kuti cigare Heets, 9 kg duhan të grirë dhe 98 pako produkte ushqimore (pashteta).
Dogana e Kosovës falënderon qytetarët për bashkëpunimin dhe thekson përkushtimin në luftën kundër kontrabandës, duke ftuar për raportimin e çdo aktiviteti të dyshimtë përmes kanaleve zyrtare.
