Dogana e Kosovës ka shënuar një sukses të rëndësishëm fiskal, duke mbledhur mbi 1 miliard euro të hyra deri në javën e tretë të korrikut 2025. Ky rezultat paraqet një rritje prej 9.7% në krahasim me periudhën e njëjtë të vitit të kaluar, kur të hyrat ishin në nivelin e 912 milionë eurove, dhe një tejkalim të dukshëm të planit vjetor.
Zyrtarët e Doganës vlerësojnë se ky progres është një tregues i fuqishëm i përmirësimit të performancës institucionale dhe i një qasjeje të vendosur ndaj luftimit të ekonomisë informale. Sipas tyre, përkundër faktit se politikat fiskale kanë ulur ndjeshëm normat tatimore, të hyrat kanë vazhduar të rriten me ritëm më të lartë sesa vetë ekonomia, madje duke e tejkaluar dyfish këtë ritëm.
“Ky është një sinjal i qartë se ndërhyrjet tona kundër ekonomisë joformale dhe masat për lehtësimin e tregtisë kanë dhënë rezultat. Për më tepër, efikasiteti dhe digjitalizimi i proceseve kanë qenë shtylla kyçe e këtij suksesi”, thuhet në njoftimin e Doganës.
Në raport theksohet gjithashtu përmirësimi i dukshëm i performancës në krahasim me periudhën para-pandemike, veçanërisht në fushën e sundimit të ligjit dhe kontrollit të derivateve në veri të vendit. Disa veprimtari të dyshuara janë pezulluar, duke ndikuar në rritjen e të hyrave dhe forcimin e rendit ligjor.
Institucioni ka shprehur falënderime për Qeverinë e Kosovës, institucionet e zbatimit të ligjit, si dhe partnerët ndërkombëtarë që kanë ofruar mbështetje në operacione dhe ngritje të kapaciteteve profesionale.
“Stafi ynë mbetet baza e këtij suksesi. Me përkushtimin e tyre të përditshëm, ata sigurojnë të hyrat që i shërbejnë drejtpërdrejt qytetarëve dhe zhvillimit të ekonomisë”, thuhet më tej në komunikatë.
Dogana e Kosovës vlerëson se trendi pozitiv do të vazhdojë edhe në muajt në vijim, duke garantuar stabilitet fiskal dhe shërbime më cilësore për publikun dhe bizneset në vend.
