Në tubim i janë bashkuar edhe figura të njohura politike dhe publike. E pranishme ishte presidentja e Kosovës, Vjosa Osmani, si dhe kryetari i BDI-së në Maqedoninë e Veriut, Ali Ahmeti, dhe kreu i Grupit Parlamentar të PS-së në Shqipëri, Taulant Balla. Në marshim morën pjesë edhe familjarë të të akuzuarve, përfshirë Endrit Thaçin, djalin e ish-presidentit Hashim Thaçi, si dhe djemtë e Kadri Veselit.
Protesta organizohet nga platforma “Liria ka Emër”, e cila kundërshton procesin gjyqësor ndaj Hashim Thaçi, Kadri Veseli, Jakup Krasniqi dhe Rexhep Selimi, për të cilët Prokuroria ka kërkuar gjithsej 180 vite burg. Organizatorët kanë paralajmëruar pjesëmarrje prej 200 deri në 250 mijë qytetarësh.
Në skenë u ngjitën edhe artistë të njohur. Këngëtari Ilir Shaqiri performoi së bashku me djalin dhe nipin e tij, ndërsa reperi Lyrical Son (Festim Arifi) hapi tubimin me këngë patriotike. E mbijetuara e dhunës seksuale gjatë luftës, Vasfije Krasniqi Goodman, foli mes emocionesh, duke kërkuar drejtësi dhe lirimin e ish-krerëve të UÇK-së.
Autoritetet kishin angazhuar forca të shtuara policore dhe ekipe emergjente për të garantuar rendin dhe sigurinë gjatë marshimit. Tubimi u zhvillua pa incidente, ndërsa mesazhi kryesor i pjesëmarrësve ishte thirrja për një proces gjyqësor të drejtë dhe të paanshëm.
