Drejtoresha e Shërbimit Informativ të Shtetit (SHISH), Vlora Hyseni, ka zhvilluar një vizitë zyrtare në Shtetet e Bashkuara të Amerikës, ku është takuar me drejtues të lartë të institucioneve të inteligjencës dhe sigurisë amerikane, në kuadër të thellimit të bashkëpunimit dypalësh.
Në fokus të vizitës ishte forcimi i partneritetit strategjik mes SHISH dhe agjencive partnere amerikane, me qëllim parandalimin e kërcënimeve të përbashkëta dhe garantimin e sigurisë rajonale e ndërkombëtare.
Takim me drejtorin e CIA-s, John Ratcliffe
Në kuadër të vizitës, Hyseni është takuar me drejtorin e CIA-s, John Ratcliffe, ku është vlerësuar bashkëpunimi mes dy agjencive dhe është theksuar rëndësia e inteligjencës së përbashkët për përballimin e sfidave globale të sigurisë. Gjatë takimit, palët diskutuan për situatën aktuale të sigurisë në rajon, rritjen e kapaciteteve operacionale dhe analitike, si dhe për zbatimin e mekanizmave të përbashkët të paralajmërimit të hershëm.
Takime me zyrtarë të ODNI, CIA dhe Departamentit të Shtetit
Gjatë qëndrimit në Uashington, drejtoresha Hyseni është takuar gjithashtu me drejtoreshën e Inteligjencës Kombëtare të SHBA (ODNI), Tulsi Gabbard, si dhe me përfaqësues të lartë të Departamentit të Shtetit dhe Agjencisë Qendrore të Inteligjencës (CIA). Takimet u përqendruan në çështje të bashkëpunimit bilateral, koordinimit për sfidat e përbashkëta të sigurisë, si dhe fuqizimit të rolit të Shqipërisë si faktor stabiliteti në Ballkanin Perëndimor.
SHISH, partner i besueshëm për SHBA-në në sigurinë kolektive
Në të gjitha takimet u theksua angazhimi i përbashkët për të ofruar inteligjencë cilësore dhe strategjike, në mbështetje të autoriteteve shtetërore të të dy vendeve. SHISH u cilësua si partner i besueshëm dhe efektiv, ndërsa Shqipëria u vlerësua si kontribuese aktive në sigurinë kolektive të rajonit dhe më gjerë.
Vizita e drejtoreshës së SHISH në SHBA shënon një tjetër hap në forcimin e marrëdhënieve të ngushta mes institucioneve të sigurisë së Shqipërisë dhe Shteteve të Bashkuara, duke theksuar rëndësinë e një partneriteti të qëndrueshëm dhe të thelluar strategjik.
