Kuvendi i Kosovës ka miratuar Projektligjin për anëtarësimin e Kosovës në Bordin e Paqes. Me 103 vota për, asnjë kundër, asnjë abstenim.
Kuvendi i Kosovës ka miratuar sot Projektligjin për anëtarësimin e Kosovës në Bordin e Paqes.
Marrëveshja u ratifikua me 103 vota për, asnjë kundër dhe asnjë abstenim.
Ky projektligj ishte paraparë të shqyrtohej në seancën e 27 prillit, por deputetët votuan që të futet në rend të ditës në seancën e sotme.
Më 19 shkurt, ish-presidentja e Kosovës, Vjosa Osmani, mori pjesë në takimin inaugurues të Bordit të Paqes në Washington, në Shtetet e Bashkuara të Amerikës.
Në këtë takim, Osmani bëri të ditur se Kosova është në mesin e pesë shteteve të para që janë zotuar për dërgimin e trupave paqeruajtëse në kuadër të një force të përbashkët ndërkombëtare për sigurinë në Gazë, duke theksuar se vendi nuk do të kontribuojë financiarisht.
Kuvendi i Kosovës tashmë e ka miratuar vendimin e Qeverisë për dërgimin e pjesëtarëve të Forcës së Sigurisë së Kosovës (FSK) në Gaza, si pjesë e Forcës Ndërkombëtare Stabilizuese.
Bordi i Paqes është pjesë e planit 20-pikësh të presidentit Trump për t’i dhënë fund konfliktit në Gazë. Bordi i Paqes i ka 27 anëtarë. Këshilli i Sigurimit i Kombeve të Bashkuara e ka autorizuar këtë trup që të mbikëqyrë zbatimin e armëpushimit në Gazë dhe të angazhohet në aspektin e qeverisjes dhe rindërtimit.
