Drone të panjohura janë parë mbi disa instalime ushtarake në Danimarkë, përfshirë edhe bazën më të madhe ajrore të vendit në Karup, duke ngritur shqetësime për sigurinë kombëtare dhe mundësinë e një “sulmi hibrid”.
Incidentet e fundit ndodhën pas një serie inkursionesh të ngjashme që ditët e fundit detyruan disa aeroporte daneze dhe nordike të mbyllnin përkohësisht hapësirën ajrore. Pamje të dronëve janë raportuar gjithashtu në Gjermani, Norvegji dhe Lituani.
Sipas oficerit të detyrës, Simon Skelsjaer, dronët u panë mbi bazën ajrore Karup rreth orës 20:15 me orën lokale dhe qëndruan në ajër për disa orë. Për shkak të incidentit, hapësira ajrore civile mbi bazë u mbyll përkohësisht, por pa ndikuar në fluturimet komerciale.
Ministria daneze e Mbrojtjes konfirmoi se dronë u raportuan pranë disa instalimeve ushtarake gjatë natës, por nuk dha detaje të tjera. Autoritetet thanë se operacioni dukej të ishte “i kryer nga një aktor profesional”, ndërsa policia po heton në bashkëpunim me ushtrinë.
Rreth 3,500 persona punojnë në bazën ajrore Karup, e cila strehon të gjithë helikopterët e Forcave të Armatosura Daneze dhe njësitë e mbikëqyrjes ajrore.
Danimarka ka parë një valë të përsëritur inkursionesh me dronë. Vetëm këtë javë, aeroportet e Kopenhagës, Aalborgut dhe Billundit u detyruan të ndalonin operimin pas raportimeve për drone mbi hapësirat e tyre. Aeroporte në Norvegji dhe Suedi kanë raportuar gjithashtu incidente të ngjashme.
Shumë analistë e shohin këtë si pjesë të një strategjie të mundshme ruse për të testuar gatishmërinë e shteteve të NATO-s që mbështesin Ukrainën, megjithëse lidhjet me Moskën nuk janë provuar. Rusia ka mohuar çdo përfshirje, duke i quajtur akuzat “spekulime absurde” dhe “provokime të inskenuara”.
Kryeministrja daneze Mette Frederiksen deklaroi pas incidenteve se “përfshirja ruse nuk mund të përjashtohet”, ndërsa Kremlini i cilësoi akuzat si “të pabaza”.
Ngjarjet ndodhin në një moment kur tensionet në Evropën Lindore janë rritur. Estonia dhe Polonia kërkuan konsultime me aleatët e NATO-s pasi raportuan shkelje të hapësirës ajrore nga dronë dhe avionë rusë, ndërsa Rumania konfirmoi një rast të ngjashëm këtë javë.
