Presidentja e Republikës së Kosovës, Vjosa Osmani, ka nderuar këngëtaren me famë botërore, Dua Lipa, me shtetësinë e Kosovës përmes një dekreti presidencial të nënshkruar sot.
Ceremonia e dhënies së shtetësisë u zhvillua në ambientet e Presidencës, ku Presidentja Osmani shprehu mirënjohje të thellë për kontributin e vazhdueshëm të artistes shqiptare në promovimin e kulturës, identitetit dhe imazhit të Kosovës në arenën ndërkombëtare.
“Mirë se erdhe në shtëpi, Dua! Është një nder i veçantë që sot, me dekret presidencial, t’ia jap shtetësinë e Republikës së Kosovës një prej personaliteteve më të rëndësishme kulturore dhe artistike në historinë e vendit tonë,” deklaroi Presidentja Osmani.
Ajo theksoi se Dua Lipa ka qenë gjithmonë e lidhur ngushtë me Kosovën dhe se me zërin dhe suksesin e saj në skenat më prestigjioze të botës, ajo është bërë simbol i krenarisë kombëtare dhe inspirim për miliona të rinj.
“Mirënjohja jonë është e pafund për gjithçka që Dua ka bërë dhe vazhdon të bëjë për Kosovën, për rininë tonë, për artin tonë dhe për imazhin ndërkombëtar të vendit tonë,” shtoi Osmani.
Dua Lipa, e cila njihet për lidhjen e saj të fortë me vendlindjen dhe për angazhimet humanitare e kulturore në Kosovë, u shpreh e emocionuar dhe falënderuese për këtë akt simbolik që, siç tha ajo, përbën një moment të paharrueshëm në jetën e saj.
Kjo është një nga nismat më të fundit të institucioneve të Kosovës për të vlerësuar personalitetet që promovojnë vendin në arenën globale dhe kontribuojnë në ndërtimin e urave të bashkëpunimit kulturor me botën.
