Prishtina u shndërrua në një qendër botërore të muzikës dhe emocioneve mbrëmjen e djeshme, kur superylli me prejardhje nga Kosova, Dua Lipa, ndezi skenën e Festivalit Sunny Hill me një performancë spektakolare.
Kryetari i LDK-së, Lumir Abdixhiku, ka reaguar përmes një postimi në rrjete sociale, duke e përshkruar natën e parë të festivalit si një moment kulmor për të rinjtë dhe kulturën në Kosovë. “Dua, me një performancë spektakolare mbrëmë, ndriçoi natën e parë të Festivalit Sunny Hill. Dhe bashkë me të, ndriçoi gjithë zemrat e mijëra të rinjve nga Kosova dhe e gjithë bota që në Prishtinë u bënë një,” shkruan ai.
Abdixhiku e cilëson Sunny Hill-in si shumë më tepër se një festival të zakonshëm, duke e quajtur “pasaportë kulturore për Kosovën”, që jo vetëm sjell artistët më të njohur në botë, por edhe vendos Prishtinën në hartën ndërkombëtare të ngjarjeve kulturore.
“Dhe pikërisht kjo është Prishtina e Kosova që duam e ëndërrojmë. Përtej të zakonshmes. Përtej vetes,” përfundon ai, duke falënderuar Dua Lipën për dashurinë ndaj vendit të saj dhe organizatorët e Sunny Hill që, siç thotë, “çdo vit sjellin një dritare të botës në Kosovë”.
Festivali Sunny Hill, i cili tashmë është shndërruar në një nga ngjarjet më të mëdha kulturore në rajon, pritet të vazhdojë me performanca të tjera të artistëve ndërkombëtarë dhe vendas përgjatë ditëve në vijim.
