Deputetja e Kuvendit të Kosovës, Duda Balje, ka konfirmuar publikisht se i është ofruar një pozitë akademike në Shkup në këmbim të votës së saj për Albulena Haxhiun, ministre nga radhët e Vetëvendosjes. Deklarata e saj erdhi gjatë një lidhjeje direkte në emisionin “Këndi i debatit” në Tëvë1, ku ajo zbuloi detaje të reja mbi ngjarjen që ka ngjallur polemika politike.
Balje tha se kishte vendosur të qëndronte në heshtje për këtë çështje, por zgjodhi të reagojë pas deklaratave të fundit të liderit të AAK-së, Ramush Haradinaj, i cili përmendi ndërhyrjet dhe presionin ndaj deputetëve lidhur me votimet në Kuvend.
“Kjo ka ndodhur para disa javësh dhe nuk kam dashur të flas, por vendosa të reagoj pasi z. Haradinaj e përmendi. E kam refuzuar ofertën dhe nuk kam shkuar as në kafe. Ajo u bë nga njerëz të partisë që janë aktualisht në pushtet”, deklaroi deputetja.
Sipas Baljes, oferta për postin si profesoreshë në Shkup u bë nga një person i njohur, me të kaluar në radhët e Ushtrisë Çlirimtare të Kosovës. Ajo theksoi se e njeh mirë këtë person dhe e respekton, por për shkak të respektit, nuk dëshiron të zbulojë identitetin e tij.
“Personi që më bëri ofertën është një doktor nga Kosova, ish-pjesëtar i UÇK-së. E respektoj shumë dhe e di që ai po më ndjek edhe tani. Ai e di kush është, dhe për respekt nuk po tregoj më shumë”, shtoi Balje.
Deputetja përsëriti qëndrimin e saj kundër mbështetjes së Vetëvendosjes, duke theksuar se nuk ka ndryshuar pozicion politik dhe nuk do ta mbështesë këtë subjekt.
Kjo deklaratë vjen në një moment të ndjeshëm politik në vend, ku akuzat për ndikime, presione dhe pazare të mundshme për vota janë bërë gjithnjë e më të shpeshta në arenën parlamentare. Për momentin, nuk ka një reagim zyrtar nga ana e Qeverisë apo Vetëvendosjes lidhur me akuzat e Baljes.
