Dy persona janë arrestuar në pikën kufitare të Jarinjës, pasi gjatë kontrollit të automjetit të tyre Policia e Kosovës ka gjetur dhe sekuestruar pajisje që dyshohet se lidhen me falsifikimin dhe keqpërdorimin e kartelave bankare.
Sipas raportit policor, rasti ka ndodhur të martën rreth orës 21:15, kur gjatë kontrollit të një automjeti me targa të Serbisë, i drejtuar nga një shtetas serb, janë zbuluar prova të shumta që lidhen me veprimtari të dyshuara kriminale.
Policia ka sekuestruar disa kartela bankare, një laptop, pajisje të ndryshme elektronike, shtatë telefona mobilë, lexues të kartelave bankare, vula të ndryshme, si dhe dëshmi të tjera relevante për hetimin.
Konfiskimi i pajisjeve është kryer në bashkëpunim me Njësinë e Krimeve Kibernetike, ndërsa rasti është iniciuar për veprën penale “Prodhim, furnizim, shitje, posedim ose dhënie në shfrytëzim e mjeteve për falsifikim (lëshim i çeqeve pa mbulesë ose të rreme dhe keqpërdorim i kartelave bankare)”.
Me vendim të prokurorit, të dyshuarve u është caktuar masa e ndalimit për 48 orë, ndërsa hetimet për zbardhjen e plotë të rastit janë duke vazhduar.
