Deputeti i LDK-së, Arben Gashi, dhe ai i AAK-së, Bekë Berisha, kanë votuar “pro” kandidaturës së Dimal Bashës për postin e Kryetarit të Kuvendit, të propozuar nga Lëvizja Vetëvendosje.
Basha ishte kandidati i tretë i propozuar gjatë ditës nga VV-ja. Në votim ai mori gjithsej 57 vota për, 25 kundër dhe 24 abstenime, por nuk arriti të sigurojë shumicën e nevojshme për t’u zgjedhur.
Arben Gashi i LDK-së tha se vendimi i tij ishte një premtim i dhënë më herët ndaj Bashës. “Ma ka kërkuar votën disa muaj më parë dhe ia kisha premtuar. Sot nuk e prisja që të dilte si kandidat, por i kam thënë që kurdo që të dalë, do ta votoj. Është djalë simpatik, jo shumë polarizues, megjithëse me disa deklarata të forta përtej normales, por pa një të kaluar që ta pengojë,” u shpreh Gashi.
Ndërkohë, Bekë Berisha i AAK-së e arsyetoi votën e tij me faktin se Basha nuk ka pasur asnjë detyrë qeveritare. “S’ka pas asnjë detyrë qeveritare. S’mund të flas për të tjerët, por për vete po,” tha ai.
