Policia e Kosovës ka njoftuar se mbrëmjen e djeshme ka arrestuar dy persona të dyshuar për posedim të substancave narkotike dhe armëmbajtje pa leje, pas një kontrolli të zhvilluar në një veturë në Vushtrri.
Sipas komunikatës zyrtare, gjatë kontrollit policor të veturës, tek shoferi është gjetur një pajisje elektroshokuese, ndërsa tek pasagjeri është zbuluar një sasi e substancës së dyshuar narkotike. Të dy të dyshuarit janë arrestuar në vendngjarje dhe mjetet e kundërligjshme janë konfiskuar si prova materiale.
Pas intervistimit në prani të prokurorit kompetent, të dy të dyshuarit janë liruar në procedurë të rregullt. Ndaj tyre janë iniciuar hetime për veprat penale “Armëmbajtje pa leje” dhe “Posedim i paautorizuar i substancave narkotike”.
Policia ka bërë të ditur se veprimet e mëtejme do të ndërmerren në përputhje me autorizimet ligjore dhe në koordinim me Prokurorinë Themelore përkatëse.
