Dy persona kanë humbur jetën dhe dy të tjerë janë lënduar si pasojë e një aksidenti të rëndë trafiku që ka ndodhur sot në mëngjes, rreth orës 05:00, në magjistralen Pejë–Prishtinë, në fshatin Zajm.
Sipas njoftimit të Policisë së Kosovës, në aksident u përfshinë një kamion, një furgon dhe një veturë me targa vendore. Në vendin e ngjarjes kanë dalë njësitë kompetente të Njësitit Rajonal të Komunikacionit Rrugor, ekipi i emergjencës dhe zjarrfikësit.
Mjekët në vendngjarje kanë konstatuar vdekjen e dy personave, ndërsa dy të lënduarit janë dërguar me autoambulancë në Spitalin Rajonal të Pejës për trajtim mjekësor.
Me urdhër të prokurorit të Shtetit, trupat e pajetë të viktimave janë dërguar në Institutin e Mjekësisë Ligjore në Prishtinë për obduksion.
