Dy persona janë dërguar në Qendrën Klinike dhe Universitare të Kosovës (QKUK), pas lëndimeve të marra nga një mjet i mprehtë. Ngjarja ka ndodhur të shtunën dhe rrethanat e incidentit nuk janë bërë ende të ditura nga autoritetet përkatëse.
Mjeku kujdestar në Klinikën Emergjente të QKUK-së, dr. Ejup Govori, konfirmoi për Klan Kosova se të plagosurit kanë pasur lëndime në ekstremitetet e sipërme dhe se janë jashtë rrezikut për jetën.
“Dy persona janë trajtuar në emergjencë. Kanë pasur lëndime me mjet të mprehtë dhe lëndimet janë në ekstremitete të sipërme. Njëri është liruar, kurse tjetri është në trajtim e sipër. Është jashtë rrezikut për jetë”, deklaroi dr. Govori.
Ndërkohë, ende nuk ka informacione zyrtare nga Policia e Kosovës lidhur me shkaqet apo autorët e ngjarjes.
