Në orët e para të mëngjesit, rreth orës 00:18, në një lokal në qytetin e Deçanit janë dëgjuar të shtëna me armë zjarri.
Policia e Kosovës është njoftuar menjëherë dhe njësitë policore kanë dalë në vendngjarje. Atje janë gjetur tre persona të plagosur: dy meshkuj nga komuniteti serb dhe një nga komuniteti shqiptar.
Sipas zëdhënësit të Policisë së Kosovës për rajonin, Fadil Gashi, të plagosurit janë dërguar fillimisht në Qendrën e Mjekësisë Familjare (QMF) në Deçan dhe më pas për trajtim të specializuar në Emergjencën e Spitalit të Përgjithshëm në Pejë.
Një person i dyshuar është arrestuar në vendngjarje. Me urdhër të prokurorit kompetent, ai është dërguar në mbajtje për 48 orë.
Në vendin e ngjarjes kanë intervenuar të gjitha njësitë kompetente policore për zbardhjen e rrethanave të plota të incidentit. Gjatë kontrollit janë sekuestruar një armë zjarri dhe një karikator me 9 fishekë.
Hetimet vazhdojnë për të përcaktuar motivin dhe rrethanat e plota të ngjarjes.
