Prokuroria Themelore në Prishtinë, përkatësisht Departamenti për Krime të Rënda – Njësiti kundër Krimit Ekonomik dhe Korrupsionit, ka bërë të ditur se ka ndaluar dy zyrtarë publikë nën dyshimet për përfshirje në veprimtari korruptive.
Sipas komunikatës zyrtare, ndalimi është bërë me vendim të prokurorit kompetent, me dyshimin se të dyshuarit kanë konsumuar veprat penale “Marrja e ryshfetit” (neni 421) dhe “Ushtrimi i ndikimit” (neni 424) të Kodit Penal të Republikës së Kosovës.
Hetimet paraprake kanë zbuluar se zyrtarët në fjalë dyshohet se i kanë kërkuar dhe më pas pranuar para nga një kandidate për testin praktik të vozitjes, duke i mundësuar kësaj të fundit kalimin e testit në kundërshtim me ligjin.
Të dyshuarve u është caktuar masa e ndalimit prej 48 orësh, ndërsa Prokurori i Shtetit është duke ndërmarrë veprimet e nevojshme për sigurimin e provave dhe ndriçimin e plotë të rastit.
Prokuroria ka ripërsëritur zotimin e saj për një luftë të paepur kundër korrupsionit dhe veprave penale që cënojnë integritetin e funksionarëve publikë, duke theksuar se të gjithë përgjegjësit do të përballen me drejtësinë pa përjashtim.
Rasti është në hetim. Për më shumë informacione, mediat dhe publiku do të njoftohen në përputhje me zhvillimet e mëtejme procedurale.
