Kosovën e pret mot plotësisht i vranët dhe me reshje shiu, vende-vende me intensitet më të lartë. Paradite do të fryjnë erëra nga jugu dhe perëndimi, duke mbajtur temperaturat relativisht të larta për këtë periudhë.
Megjithatë, vonë pasdite dhe sidomos në mbrëmje pritet ndryshim i situatës. Erërat do të kthehen nga veriu, duke sjellë ajër më të ftohtë, çka do të bëjë që reshjet e shiut të shndërrohen në borë në shumë pjesë të vendit. Reshjet e borës nuk pritet të zgjasin shumë, por mund të krijojnë shtresa të përkohshme në disa zona.
Temperaturat do të luhaten nga 3°C minimalja deri në 13°C maksimalja, ndërsa në mbrëmje pritet rënie e ndjeshme e tyre, veçanërisht në Rrafshin e Kosovës.
