E enjtja do të karakterizohet nga mot relativisht i ngrohtë në Kosovë dhe në të gjithë rajonin, megjithëse mëngjesi pritet të jetë ende i ftohtë.
Sipas parashikimeve meteorologjike, në Kosovë orët e paradites do të jenë kryesisht me diell. Megjithatë, gjatë pasdites pritet një shtim gradual i vranësirave, të shoqëruara me reshje të pakta dhe lokale. Vonë gjatë natës, reshjet e shiut pritet të përfshijnë pothuajse tërë territorin e vendit. Temperaturat do të lëvizin nga 4°C në orët e para të mëngjesit deri në 24°C gjatë ditës.
Në Shqipëri, Maqedoninë e Veriut, Luginën e Preshevës dhe Malin e Zi, e enjtja gjithashtu sjell mot të ngrohtë dhe kryesisht stabil. Megjithatë, në Shqipëri vranësirat e para nga një ciklon pritet të mbërrijnë më herët, ndërsa në Maqedoninë e Veriut dhe Luginën e Preshevës ato do të shfaqen më vonë. Gjatë mbrëmjes, reshjet do të fillojnë në jug të Shqipërisë dhe gradualisht do të shtrihen në drejtim të viseve të tjera të rajonit.
Ndërkohë, Maqedonia e Veriut dhe Lugina e Preshevës pritet të përjetojnë ditën më të nxehtë dhe më të ndritshme të javës, me më shumë orë dielli dhe temperatura më të larta krahasuar me pjesën tjetër të rajonit.
