Të enjten, Kosova do të përballet me kushte të paqëndrueshme atmosferike. Parashikimet tregojnë se në orët e mëngjesit, disa rajone do të preken nga rrebeshe lokale shiu, të shoqëruara me vetëtima dhe bubullimë.
Gjatë ditës priten intervale me diell të ndërthurura me vranësira të shpërndara, ndërsa pasdite mund të rikthehen rrebeshe të izoluara. Megjithatë, në shumë zona nuk parashikohen reshje. Temperaturat do të variojnë nga 14°C minimalja në mëngjes deri në 28°C maksimalja gjatë ditës.
Situatë e ngjashme pritet edhe në rajon. Shqipëria, Maqedonia e Veriut, Lugina e Preshevës dhe Mali i Zi do të kenë mot kryesisht me diell e vranësira. Vranësirat në disa zona pritet të marrin zhvillim të fuqishëm, duke shkaktuar rrebeshe lokale shiu, vetëtima, bubullimë dhe mundësi për breshër. Po ashtu, nuk përjashtohen as stuhitë e shkurtra lokale.
