E hëna në Kosovë pritet të karakterizohet nga mot shumë i ftohtë, me intervale kohore me diell dhe vranësira të pakta lokale. Gjatë ditës do të fryjnë erëra të ftohta nga veriu, duke e rritur ndjeshëm ndjesinë e acarit, ndërsa rrallë në disa zona mund të shfaqen edhe fjolla të izoluara bore.
Temperaturat minimale do të zbresin deri në -12 gradë Celsius, ndërsa maksimalet do të mbesin nën zero, duke arritur rreth -2 gradë Celsius.
Edhe rajoni më i gjerë do të përfshihet nga i ftohti. Në Shqipëri, Maqedoninë e Veriut, Luginë të Preshevës dhe Mal të Zi, e hëna sjell mot kryesisht të kthjellët dhe pa reshje atmosferike. Priten periudha të gjata me diell në shumicën e viseve, por temperaturat do të mbesin shumë të ulëta, duke krijuar kushte tipike dimërore.
Qytetarët këshillohen të tregojnë kujdes të shtuar për shkak të acarit dhe erërave të ftohta, sidomos në orët e mëngjesit dhe mbrëmjes.
