Fillimi i javës në Kosovë pritet të karakterizohet nga një mot i paqëndrueshëm, me alternime të shkurtra të kthjellimeve dhe vranësirave. Sipas parashikimeve meteorologjike, pasditja do të sjellë rrebeshe lokale shiu të shoqëruara me vetëtima dhe bubullimë, kryesisht në gjysmën veriore të vendit. Ndërsa jugu do të përjetojë më pak zhvillime atmosferike.
Erërat do të fryjnë herë pas here me intensitet të lartë, veçanërisht nga drejtimi jugperëndimor, duke ndikuar në ndjesinë termike. Temperatura maksimale gjatë ditës pritet të arrijë deri në 22°C.
Situatë e ngjashme parashikohet edhe në vendet fqinje. Shqipëria, Maqedonia e Veriut, Lugina e Preshevës dhe Mali i Zi do të përballen me mot të ndryshueshëm – me diell, por edhe me vranësira të shpeshta lokale. Në disa rajone do të ketë rrebeshe të izoluara shiu, të shoqëruara me vetëtima dhe bubullimë, ndërsa shumë zona të tjera do të mbeten pa reshje.
Rreziku më i madh për reshje të izoluara do të jetë në veri të Shqipërisë, në pjesë të Maqedonisë së Veriut dhe në Luginën e Preshevës.
Qytetarët këshillohen të jenë të kujdesshëm gjatë pasdites për shkak të mundësisë së reshjeve intensive dhe kushteve të paqëndrueshme atmosferike.
