Pas rrebesheve të izoluara dhe freskisë së përkohshme të së dielës, e hëna do të rikthejë nxehtësinë e fortë verore në mbarë territorin e Kosovës. Sipas parashikimeve meteorologjike, do të mbajë mot kryesisht i kthjellët dhe shumë i nxehtë, pa ndonjë ndikim të dukshëm nga masat ajrore të ftohta.
Temperaturat maksimale pritet të arrijnë deri në 36 ose 37°C, ndërsa nuk parashikohet ndonjë reshje ose freskim gjatë ditës. Ekspertët rekomandojnë kujdes të shtuar gjatë orëve të mesditës, sidomos për personat e ndjeshëm ndaj nxehtësisë, të moshuarit dhe fëmijët.
E njëjta situatë pritet të mbizotërojë edhe në Shqipëri, Maqedoninë e Veriut, Luginën e Preshevës dhe Mal të Zi, ku do të mbajë mot me diell dhe temperaturat do të jenë në rritje në të gjitha zonat.
Vapa pritet të jetë më e ndjeshme në zonat urbane dhe ato të ultësirës, ku ndikimi i efektit të nxehtësisë urbane do të jetë më i theksuar. Autoritetet këshillojnë hidratim të rregullt, shmangie të ekspozimit të drejtpërdrejtë në diell dhe kujdes të shtuar për punëtorët që qëndrojnë jashtë në temperatura ekstreme.
