E mërkura në Kosovë pritet të karakterizohet me mot të ftohtë, kalime vranësirash dhe intervale kohore me diell. Rajoni i Dukagjinit do të ketë kryesisht mot me diell dhe shumë pak vranësira, ndërsa në pjesët tjera të vendit do të alternohen vranësirat dhe kthjellimet.
Në disa zona kodrinore-malore nuk përjashtohet mundësia për reshje të dobëta dhe të izoluara bore. Temperaturat do të shënojnë vlera shumë të ulëta në mëngjes, duke zbritur deri në -10 gradë Celsius, ndërsa maksimalet ditore do të arrijnë rreth 0 gradë Celsius.
Rajoni: Diell, por me rënie të ndjeshme temperaturash
Edhe në Shqipëri, Maqedonia e Veriut, Lugina e Preshevës dhe Mali i Zi pritet mot me diell dhe vranësira kalimtare, i shoqëruar me ulje të ndjeshme të temperaturave.
Në orët e hershme të mëngjesit, vranësira më të shprehura priten në lindje dhe juglindje të Shqipërisë, ku lokalisht mund të ketë reshje kalimtare bore. Gjatë ditës, në pothuajse të gjitha viset e rajonit pritet mot kryesisht me diell dhe vranësira të pakta lokale.
