E mërkura në Kosovë do të karakterizohet nga moti i paqëndrueshëm, me vranësira të dendura, reshje të dendura shiu dhe rrebeshe të herëpashershme, ndërsa temperaturat do të shënojnë rënie të ndjeshme në të gjithë vendin.
Sipas parashikimeve meteorologjike, në orët e para të mëngjesit reshjet do të nisin në veri, ku do të ndjehet edhe fillimi i uljes së temperaturave. Më pas, rrëbeshet dhe ajri më i freskët do të përfshijnë edhe jugun, ku fillimisht mund të ketë intervale me diell, por gjatë ditës pritet shtim i vranësirave dhe shira lokalë.
Paralajmërim për mot ekstrem
Instituti Hidrometeorologjik i Kosovës njofton se masa ajrore më të ftohta do të depërtojnë në rajon, duke krijuar kushte për reshje intensive, të cilat në disa zona mund të shoqërohen me breshër dhe shkarkime rrufesh. Kjo gjendje do të krijojë kushtet për ndonjë destabilizim të shpejtë atmosferik, veçanërisht në zonat kodrinore-malore.
Temperaturat
Temperaturat do të lëvizin ndërmjet 13°C në mëngjes dhe deri në 19°C në mesditë, që përfaqëson një ulje të konsiderueshme krahasuar me ditët e fundit.
Kujdes nga rrezatimi diellor
Megjithëse reshjet do të dominojnë, në disa rajone, në orët mes 10:00 dhe 17:00, mund të ketë intervale me diell të fortë, ndaj parashikohet rrezatim i lartë UV. Qytetarët këshillohen të shmangin ekspozimin e gjatë në diell gjatë këtij intervali kohor dhe të përdorin mbrojtje UV, sidomos fëmijët dhe të moshuarit.
Meteorologët apelojnë për kujdes të shtuar në trafik dhe gjatë qëndrimit në natyrë, për shkak të rrëshqitjeve të mundshme të dheut dhe rrufeve, si dhe të shmangen aktivitetet në hapësira të hapura gjatë rrebesheve.
