Kryetari i Partisë Mundësia, Agron Shehaj, ka reaguar pas rezultatit të zgjedhjeve të 11 majit, ku partia e tij arriti të sigurojë dy mandate parlamentare. Përmes një postimi në rrjetin social Facebook, Shehaj ka ndarë një foto me ekipin e tij dhe ka deklaruar se “e pamundura ndodhi”, duke e cilësuar rezultatin si thyerje të një “muri të pakalueshëm”.
“Pavarësisht frikës së mbjellë natë për natë, sistemit të ngritur për të mos lënë askënd të ri të ngjitet dhe propagandës së pushtetit, ne luftuam, u përballëm dhe ia dolëm”, u shpreh Shehaj.
Sipas tij, mbi 50 mijë qytetarë i dhanë besimin Partisë Mundësia, pa premtime boshe, pa pazare dhe pa kompromise. Ai theksoi se ky sukses është vetëm fillimi dhe se puna e vërtetë nis tani.
“Ne do të jemi aty, me zë, me fakte, me qëndresë. Për çdo qytetar që na dha votën. Për çdo shqiptar që pret më shumë”, deklaroi ai.
Shehaj u bëri thirrje të gjithë qytetarëve që besojnë në ndryshim t’i bashkohen Partisë Mundësia, duke e konsideruar këtë forcë politike si opozita e shekullit 21 – e ndershme, moderne, dhe e vendosur për të ndërtuar një të ardhme më të mirë.
Në fund të reagimit, ai shprehu mirënjohjen për të gjithë ata që kontribuuan në këtë arritje: votuesit, kandidatët, vëzhguesit, koordinatorët, mbështetësit në Shqipëri dhe diasporë, si dhe ambasadorët e Partisë Mundësia.
