Kosova të premten pritet të përballet me një rënie të lehtë të temperaturave, si pasojë e depërtimit të erërave më të ftohta nga verilindja. Ftohja do të ndihet më së shumti në Rrafshin e Kosovës, ku pritet edhe shtim i vranësirave, megjithëse nuk do të mungojnë intervalet me diell.
Mëngjesi do të jetë dukshëm i ftohtë, shoqëruar me ngrica dhe mjegull në disa zona, veçanërisht në ultësira ku mjegulla mund të qëndrojë për një kohë më të gjatë.
Temperaturat minimale do të zbresin deri në -3°C, ndërsa gjatë ditës pritet një rritje e lehtë, me maksimalet që do të arrijnë deri në 8°C.
Meteorologët parashikojnë mot stabil dhe pa reshje, por me tendencë ftohjeje në ditët në vijim.
