E premtja në Kosovë do të karakterizohet me shtim të vranësirave dhe reshje lokale, të cilat do të jenë në formë bore, shqote dhe shiu, varësisht nga rajoni dhe kushtet termike.
Mëngjesi do të nisë me acar, ndërsa gjatë ditës pritet zbutje graduale e temperaturave, sidomos me depërtimin e vranësirave dhe reshjeve. Në disa rajone, ku ajri i ftohtë do të qëndrojë më gjatë, reshjet do të shfaqen fillimisht si borë, por më pas në shumicën e viseve do të shndërrohen në shqotë dhe shi.
Në zonat malore, reshjet e borës pritet të zgjasin më shumë dhe të mbeten forma dominuese e reshjeve gjatë ditës.
Erërat do të fillojnë të fryjnë nga jugu dhe jugperëndimi, duke ndikuar në rritjen graduale të temperaturave dhe ndryshimin e fazës së reshjeve.
Temperaturat pritet të lëvizin nga -6 gradë Celsius në orët e mëngjesit, deri në rreth 3 gradë Celsius gjatë ditës.
