E shtuna në Kosovë pritet të dominohet nga vranësira të dendura dhe reshje të shpeshta shiu gjatë shumicës së ditës. Lokalisht mund të paraqiten rrebeshe më intensive, të shoqëruara herë pas here me vetëtima dhe bubullima të izoluara.
Temperaturat do të nisin të bien ndjeshëm krahas ndryshimit të masave ajrore. Në zonat malore do të shfaqen reshjet e para të borës, ndërsa në orët e vona të mbrëmjes priten reshje të përziera shiu dhe bore edhe në disa zona më të ulëta, kryesisht në veri dhe verilindje të vendit.
Maksimalet ditore do të luhaten ndërmjet 10°C dhe 14°C, duke shënuar fundin e periudhës së pazakontë të ngrohtë që ka shoqëruar vendin ditët e fundit.
