Edon Zhegrova është gati për një hap të ri në karrierën e tij, duke u transferuar nga Lille te Juventus në Serie A. Sipas raportimeve të gazetës italiane Tuttosport, anësori shqiptar i sulmit ka pranuar ofertën e bardhezinjve dhe shumë shpejt pritet të prezantohet te “Zonja e Vjetër”.
Sezonin e kaluar në Champions League, Zhegrova shkëlqeu kundër Juventusit, gjë që duket se ka mbetur në vëmendjen e drejtuesve të klubit italian. Tani, kushtet janë finalizuar dhe 26-vjeçari shihet si një lojtar shumëfunksional, i cili mund të luajë në tre pozicione të ndryshme: në mesfushë, në krahët e sulmit dhe si sulmues i dytë. Për më tepër, njohja me sulmuesin David, i transferuar këtë verë nga Lille te Juventus, e bën bashkëpunimin më të lehtë në fushë.
Drejtori sportiv i Juventusit, Damien Comolli, ka negociuar me agjentin e Zhegrovës, Hasan Çetinkaya, gjatë ditëlindjes së tij për të finalizuar detajet e marrëveshjes.
Shifrat e transferimit
Raportimet pranë Juventusit bëjnë me dije se Zhegrova do të firmosë një kontratë afatgjatë me vlerë 2.5 milionë euro në sezon, plus bonuse të tjera. Lille, që ende ka një vit kontratë me lojtarin, mund të pranojë një shifër rreth 17-18 milionë euro, nga 25 milionë euro që kërkohej më parë.
Konkurrenca dhe sfondi
Juventus duket se ka mposhtur konkurrencën e klubeve të tjera si Marseille, Milan dhe Napoli. Italia duket të jetë vendi i fatit për Zhegrovën, i cili ishte i vlerësuar edhe nga Milani në një turne ndërkombëtar të të rinjve nën 14 vjeç në vitin 2011, por transferimi dështoi për shkak të rregulloreve ndërkombëtare për lojtarët nën 16 vjeç.
Me këtë transferim, Edon Zhegrova shpreson të lërë gjurmë në Serie A dhe të tregojë vlerën e tij me fanellën bardhezi të Juventusit.
