Autoritetet e sigurisë në Emiratet e Bashkuara Arabe kanë çmontuar një rrjet të dyshuar terrorist, i cili sipas burimeve zyrtare dyshohet se financohej dhe drejtohej nga Hezbollah me mbështetje nga Irani.
Sipas agjencisë shtetërore të lajmeve, anëtarët e këtij rrjeti janë arrestuar, ndërsa aktiviteti i tyre mbulohej përmes një strukture të rreme tregtare.
Autoritetet njoftuan se grupi ishte i përfshirë në pastrim parash, financim të terrorizmit dhe veprime që cenonin sigurinë kombëtare, me synim destabilizimin financiar të vendit.
Ndërkohë, Libani ka dënuar ashpër këtë që e cilësoi si një “komplot terrorist” kundër Emirateve, duke ofruar bashkëpunim për hetimin e plotë të rastit dhe duke rikujtuar vendimin për ndalimin e aktiviteteve ushtarake të Hezbollah-ut në territorin e tij.
Deri më tani nuk ka pasur reagim nga Hezbollah apo nga Irani lidhur me këto akuza.
Ky zhvillim vjen pas një rasti të ngjashëm në Kuvajti, ku autoritetet zbuluan një rrjet tjetër të dyshuar të lidhur me Hezbollah-un dhe sekuestruan armë, municione dhe dronë.
Operacioni në Emirate zhvillohet në një kohë tensionesh të larta në rajon, pas përshkallëzimit të konfliktit mes SHBA-së, Izraelit dhe Iranit, duke shtuar shqetësimet për sigurinë në vendet e Gjirit.
