Presidenti i Turqisë, Rexhep Tajip Erdogan, ka adresuar çështjen e blerjes së avionëve luftarakë F-35 dhe ka reaguar ndaj qëndrimit kritik të Greqisë, gjatë një deklarate për media në fluturimin e kthimit nga Azerbajxhani.
Në deklaratat e tij, Erdogan tha se shqetësimet e Athinës për përforcimin e mbrojtjes turke janë të pabaza, duke shtuar se Turqia nuk përbën kërcënim për askënd që nuk cenon interesat e saj kombëtare.
“Shqetësimi i Greqisë për hapat që kemi ndërmarrë në fushën e mbrojtjes është i pabazë dhe pa kuptim. Turqia nuk është kërcënim për asnjë vend që nuk cenon sigurinë dhe interesat e saj, dhe nuk shfaq qëndrim armiqësor,” deklaroi Erdogan.
Takimi me Trump dhe besimi për F-35
Presidenti turk konfirmoi se çështja e avionëve F-35 është diskutuar edhe me Presidentin amerikan Donald Trump, gjatë Samitit të fundit të NATO-s, ku sipas tij, u dhanë sinjale pozitive për zbatimin e marrëveshjes për dorëzimin e avionëve.
“Besoj se dorëzimi gradual i avionëve F-35 për Turqinë do të realizohet gjatë mandatit të tij,” theksoi Erdogan.
Mbrojtja si prioritet strategjik
Sipas Erdoganit, blerja e F-35-ve nuk është vetëm çështje teknologjike, por strategji sigurie dhe bashkëpunimi ndërkombëtar, sidomos brenda NATO-s.
“Kjo nuk është thjesht një çështje teknologjie ushtarake, por një hap drejt bashkëpunimit të fuqishëm ndërkombëtar. Kemi përshpejtuar përpjekjet në industrinë e mbrojtjes dhe po forcojmë infrastrukturën tonë për sigurinë kombëtare,” tha ai.
Presidenti turk rikujtoi gjithashtu se në samitin e NATO-s u ra dakord që shtetet anëtare të rrisin investimet në mbrojtje për të garantuar sigurinë kolektive.
“Vendimi ishte që vendet e NATO-s duhet të forcojnë infrastrukturën e tyre mbrojtëse. Turqia po vepron në përputhje me këtë orientim strategjik.”
“Turqia, faktor paqeje dhe stabiliteti”
Në përmbyllje, Erdogan ritheksoi se Turqia është një aleat i besueshëm, që përpiqet të sjellë zgjidhje paqësore në çdo konflikt rajonal.
“Nuk ka asnjë konflikt në rajon për të cilin Turqia të mos përpiqet të gjejë një zgjidhje paqësore. Ne jemi kontribuues të paqes dhe stabilitetit, jo kërcënim,” përfundoi ai.
