Udhëheqësit evropianë kanë deklaruar se vijat aktuale të frontit në Ukrainë duhet të shërbejnë si pikënisje për çdo proces të ardhshëm bisedimesh për paqe, ndërsa përgatitjet për takimin e paralajmëruar midis presidentit amerikan Donald Trump dhe atij rus Vladimir Putin duket se janë pezulluar.
Trump, i cili javën e kaluar zhvilloi biseda me Putinin dhe u takua me presidentin ukrainas Volodymyr Zelensky në Uashington, ka shprehur synimin që brenda dy javësh të takohet me Putinin në Budapest, si pjesë e përpjekjeve për t’i dhënë fund luftës në Ukrainë. Megjithatë, një takim paraprak mes sekretarit amerikan të Shtetit, Marco Rubio, dhe ministrit të Jashtëm rus, Sergei Lavrov, është shtyrë, duke lënë pezull agjendën diplomatike.
Në një deklaratë të përbashkët, Britania, Franca, Gjermania dhe Bashkimi Evropian kanë theksuar mbështetjen për qëndrimin e presidentit Trump se “luftimet duhet të ndalen menjëherë dhe vija e tanishme e kontaktit duhet të shërbejë si bazë për negociatat e paqes”. Kjo qasje përputhet me qëndrimin e kahershëm të Ukrainës dhe aleatëve të saj, të cilët kanë kërkuar armëpushim përgjatë vijave aktuale të frontit përpara çdo marrëveshjeje të mundshme politike. Ndërkohë, Moska ka sinjalizuar se kërkon dorëzimin e më shumë territori si pjesë e kushteve të saj për armëpushim, ndërsa burime ndërkombëtare raportojnë se takimi i fundit mes Trumpit dhe Zelenskyt në Shtëpinë e Bardhë ka qenë i tensionuar. Zelensky megjithatë e ka cilësuar takimin si “pozitiv”, duke theksuar mbështetjen publike të SHBA-së për armëpushimin në vijat aktuale të frontit. Udhëheqësit evropianë pritet të takohen me Zelenskyn këtë javë në një samit të BE-së, ku do të diskutohet edhe mundësia e krijimit të një force ndërkombëtare sigurie pas përfundimit të luftës. /Qendra.info/
