Burime të sigurta konfirmojnë për Demokracia.com se është arritur një marrëveshje politike mes kreut të Lëvizjes Vetëvendosje, Albin Kurti, dhe kryetarit të Nismës, Fatmir Limaj, që i hap rrugë konstituimit të Kuvendit dhe zgjedhjes së një qeverie të re. Në qendër të kësaj marrëveshjeje është emri i Fatmir Limajt, i cili pritet të zgjidhet Kryetar i Kuvendit të Kosovës.
Ky zhvillim vjen pas disa përpjekjeve të dështuara për konstituimin e institucioneve, ndërsa burimet thonë se Kurti ka pranuar ta “sakrifikojë” Albulena Haxhiun për ta mundësuar këtë kompromis politik. Ende mbetet e paqartë nëse Lista Guxo, partnere në koalicionin qeverisës, është pajtuar me këtë vendim. Kryetarja e saj, Donika Gërvalla, ka qenë një nga zërat më kritikë ndaj kandidimit të Limajt, duke theksuar se një subjekt me vetëm tre deputetë nuk mund të pretendojë për pozitën e dytë më të lartë në shtet.
Përtej kësaj, Kurti duket se ka siguruar edhe mbështetjen e dy deputetëve të komuniteteve pakicë. Si pjesë e marrëveshjes, atyre u është premtuar përfshirje në ekzekutiv përmes zgjerimit të numrit të ministrive. Burime pranë negociatave bëjnë të ditur se zëvendëskryeministrja aktuale, Emilia Rexhepi, ka pranuar të tërhiqet nga pozita për t’i hapur rrugë këtij konfigurimi të ri politik dhe do të mbetet deputete.
Nëse nuk ndodhin ndryshime të papritura në qëndrimet e deputetëve të komuniteteve, konstituimi i Kuvendit mund të ndodhë që nesër – duke shënuar një kthesë të rëndësishme në zhvillimet politike në vend. Ndërkohë, qeveria e re që pritet të formohet, mund të përballet shumë shpejt me sfidën e ruajtjes së shumicës parlamentare.
