FBI dhe grupi i përbashkët kundër terrorizmit po hetojnë motivin e Rahmanullah Lakanwal, një emigrant afgan, i cili hapi zjarr ndaj dy ushtarëve të Gardës Kombëtare vetëm disa blloqe larg Shtëpisë së Bardhë, në prag të Ditës së Falënderimeve. Zyrtarët e kanë cilësuar incidentin si një sulm në pritë.
Dy ushtarë në gjendje kritike – i dyshuari i plagosur dhe i arrestuar
Dy ushtarët, pjesë e një operacioni të militarizuar të zbatimit të ligjit të urdhëruar nga Presidenti Donald Trump, u dërguan në spital në gjendje kritike. Lakanwal u plagos në shkëmbimin e zjarrit dhe u arrestua në vendngjarje.
Departamenti i Sigurisë Kombëtare e identifikoi 29-vjeçarin si shtetas afgan që hyri në SHBA në vitin 2021 përmes programit “Welcome Allies”, një iniciativë e administratës Biden për riatdhesimin e afganëve që kishin bashkëpunuar me forcat amerikane në Afganistan.
Trump: “Akt urrejtjeje dhe terrori” – rishikim masiv i të gjithë afganëve në SHBA
Trump, nga resorti i tij në Florida, reagoi me një deklaratë të pararegjistruar duke e quajtur sulmin “akt terrori”, dhe paralajmëroi rishqyrtim të të gjithë afganëve të sjellë në SHBA gjatë kohës së Bidenit.
Në të njëjtën linjë, Shërbimet e Shtetësisë dhe Imigracionit ndaluan përkohësisht të gjitha kërkesat e reja të imigracionit për shtetas afganë, derisa të rishikohen protokollet e sigurisë.
Historia e Lakanwal: ish-ushtar afgan, punëtor në Amazon
Sipas NBC News, Lakanwal ka shërbyer për 10 vjet në ushtrinë afgane, duke punuar krah forcave speciale amerikane në Kandahar. Ai jetonte në shtetin e Uashingtonit dhe punonte në Amazon.
Nuk kishte precedentë penalë. Sipas një zyrtari të administratës Trump, ai kishte marrë azil në prill 2025.
Si ndodhi sulmi
Incidenti ndodhi rreth mesditës, jashtë një stacioni metroje në një zonë të frekuentuar pranë Shtëpisë së Bardhë. Dy ushtarët e Virxhinias Perëndimore ishin në patrullë me dukshmëri të lartë kur Lakanwal, sipas policisë, erdhi nga cepi, nxori armën dhe qëlloi direkt mbi ta.
Trupa të tjerë të Gardës ndërhynë dhe e neutralizuan.
Shërbimi Sekret vendosi Shtëpinë e Bardhë në bllokim sigurie menjëherë pas të shtënave.
Politika në prapaskenë: tension mes Trump dhe kryetares së Uashingtonit
Sulmi vjen pak ditë pasi një gjyqtare federale pezullonte vendosjen e trupave të Gardës Kombëtare në rolet e zbatimit të ligjit në Uashington pa miratimin e kryetares së bashkisë, Muriel Bowser. Pezullimi hyn në fuqi në dhjetor, pas apelimit të administratës Trump.
Trump ka vendosur trupa edhe në qytete të tjera të drejtuara nga demokratët, si Los Angeles, Chicago, Portland dhe Memphis, në emër të luftës kundër krimit. Kritikët e akuzojnë për politizim të trupave dhe përdorim të forcës si mjet presioni ndaj kundërshtarëve.
Zëvendëspresidenti JD Vance e përdori incidentin për të justifikuar linjën e ashpër të administratës ndaj emigracionit:
“Duhet të dyfishojmë përpjekjet për të deportuar ata që nuk kanë të drejtë të qëndrojnë.”
