FBI ka kontrolluar shtëpinë e John Bolton, ish-këshilltar i sigurisë kombëtare në administratën e parë të Donald Trump, në Maryland. Ky veprim lidhet me një hetim mbi trajtimin e dokumenteve të klasifikuara, raportoi të premten Associated Press (AP), duke cituar një burim të njohur me çështjen.
Sipas AP, burimi që ka dhënë informacionin nuk ishte i autorizuar të fliste me emër dhe prandaj pranoi të fliste vetëm në kushte anonimiteti.
Ende nuk ka pasur reagim zyrtar nga John Bolton, avokatët e tij apo Shtëpia e Bardhë. Për momentin, zëdhënësi i Bolton nuk i është përgjigjur pyetjeve të mediave.
Bolton, i cili ka shërbyer si një prej figurave kryesore të politikës së jashtme në fillim të administratës Trump, u bë më vonë një nga kritikët më të ashpër të ish-presidentit.
